సాక్షీ డిజిటల్ న్యూస్ | సెప్టెంబర్ 30: గుజరాత్‌లోని సూరత్‌లో 23 ఏళ్ల ప్రైవేట్ ట్యూటర్, 13 ఏళ్ల తన విద్యార్థితో కలిసి వెళ్లిపోయిన ఘటన తీవ్ర కలకలం రేపుతోంది. ఐదు నెలల గర్భంతో ఆమె పోలీసులకు చిక్కడంతో కేసులో మరో కీలక మలుపు చోటుచేసుకుంది. తన గర్భానికి ఆ మైనర్ బాలుడే తండ్రి అని ఆమె పోలీసుల విచారణలో చెప్పినట్లు అధికారులు వెల్లడించారు. దీంతో వాస్తవాలను నిర్ధారించేందుకు డీఎన్‌ఏ పరీక్షకు అధికారులు ఆదేశించారు. ఈ ఘటన ఏప్రిల్ 25న బాలుడు, ట్యూటర్ ఇద్దరూ అదృశ్యమైన తర్వాత వెలుగులోకి వచ్చింది. వారి నివాస సముదాయంలోని సీసీటీవీ ఫుటేజీలో ట్యూటర్ భుజానికి బ్యాగ్ వేసుకుని బాలుడితో కలిసి బయటకు వెళ్తున్న దృశ్యాలు నమోదైనట్లు దర్యాప్తులో వెల్లడైంది.

ఆ బాలుడికి గత మూడేళ్లుగా సదరు మహిళ ట్యూషన్ చెబుతున్నట్లు పోలీసులు గుర్తించారు. గత ఏడాది నుంచి అతడే ఆమె వద్ద ట్యూషన్ తీసుకుంటున్న ఏకైక విద్యార్థిగా ఉన్నట్లు సమాచారం. పోలీసుల దర్యాప్తు ప్రకారం.. బాలుడిపై లైంగిక దాడికి సంబంధించిన ఘటనలు ట్యూటర్ నివాసంలో, అనంతరం వారు పరారీలో ఉన్న సమయంలో వడోదరలోని ఓ హోటల్‌లో జరిగినట్లు ఆరోపణలు ఉన్నాయి. సూరత్ నుంచి తప్పించుకునే ముందు బాలుడు తనకు చెందిన కొన్ని దుస్తులను మహిళకు ఇచ్చినట్లు, ఆ తర్వాత ఆమె మరికొన్ని వస్తువులు కొనుగోలు చేసినట్లు పోలీసులు తెలిపారు.

ఇద్దరూ వడోదర, అహ్మదాబాద్, ఢిల్లీ, జైపూర్, వృందావన్ తదితర ప్రాంతాలకు వెళ్లినట్లు దర్యాప్తులో వెల్లడైంది. నాలుగు రోజుల పాటు పోలీసులు గాలింపు చర్యలు చేపట్టిన అనంతరం గుజరాత్-రాజస్థాన్ సరిహద్దు సమీపంలో వారిని గుర్తించి అదుపులోకి తీసుకున్నట్లు సమాచారం. సూరత్ డీసీపీ భగీరథ్ గాధ్వీ ప్రకారం.. వైద్య పరీక్షల్లో మహిళ ఐదు నెలల గర్భంతో ఉన్నట్లు నిర్ధారణ అయింది. ఆమె వాంగ్మూలం ఆధారంగా డీఎన్‌ఏ పరీక్షకు ఆదేశించినట్లు ఆయన తెలిపారు. విచారణలో ఇద్దరూ కొంతకాలంగా శారీరక సంబంధంలో ఉన్నట్లు అంగీకరించినట్లు పోలీసులు వెల్లడించారు.

మైనర్‌ను కిడ్నాప్ చేసిన ఆరోపణలతో భారతీయ న్యాయ సంహిత కింద మహిళపై కేసు నమోదు చేయడంతో పాటు, పోక్సో చట్టంలోని తీవ్రమైన సెక్షన్ల కింద కూడా చర్యలు తీసుకున్నట్లు సమాచారం. విద్యార్థి-ఉపాధ్యాయ సంబంధంలో నమ్మకాన్ని దుర్వినియోగం చేసిన ఘటనగా అధికారులు పేర్కొంటున్నారు. ప్రస్తుతం కేసుపై దర్యాప్తు కొనసాగుతుండగా, కోర్టు ఆదేశించిన డీఎన్‌ఏ పరీక్ష ఫలితాల ఆధారంగా తదుపరి న్యాయపరమైన చర్యలు తీసుకోనున్నారు.