సేవ మార్గంలో ” టచ్ ఏ లైఫ్ ఫౌండేషన్ ” ఆధ్వర్యంలో ఉచిత స్కాలర్షిప్ క్యాంప్

సాక్షి డిజిటల్ న్యూస్ – ఏప్రిల్ 19- సికింద్రాబాద్- సీతాఫలమండి మల్టీ పర్పస్ ఫంక్షన్ హాల్‌లో మాజీ కార్పొరేటర్ డా. సామల హేమ lఆధ్వర్యంలో, టచ్ ఏ లైఫ్ ఫౌండేషన్ సహకారంతో పేద మరియు ప్రతిభ గల విద్యార్థుల కోసం ఉచిత స్కాలర్షిప్ క్యాంప్ ఘనంగా నిర్వహించబడింది. ఈ కార్యక్రమంకు విశేష స్పందన లభించిందని ఆమె తెలిపారుఈ స్కాలర్షిప్ క్యాంప్‌లో పలు కళాశాలల నుంచి వచ్చిన విద్యార్థులు మరియు వారి తల్లిదండ్రులు భారీగా పాల్గొన్నారు. విద్యార్థుల విద్యా ప్రగతిని దృష్టిలో ఉంచుకుని, వారి ఆర్థిక పరిస్థితులను పరిశీలిస్తూ, అర్హులైన వారికి స్కాలర్షిప్‌లు అందించేందుకు ప్రాథమికంగా నమోదు ప్రక్రియ చేపట్టారు. ఈ సందర్భంగా విద్యార్థుల విద్యా ధ్రువపత్రాలు, ప్రతిభను పరిశీలిస్తూ వారికి సరైన మార్గదర్శకత్వం కూడా అందించారు. మాజీ కార్పొరేటర్ డా. సామల హేమ మాట్లాడుతూ, సమాజంలో పేద కుటుంబాలకు చెందిన అనేక మంది ప్రతిభావంతులైన విద్యార్థులు ఉన్నారని, అయితే ఆర్థిక ఇబ్బందుల కారణంగా వారు ఉన్నత విద్యను కొనసాగించలేకపోతున్నారని ఆవేదన వ్యక్తం చేశారు. అలాంటి విద్యార్థులకు సహాయం చేయడం సమాజంలోని ప్రతి ఒక్కరి బాధ్యత అని ఆమె అన్నారు.ఈ కార్యక్రమానికి దాదాపు 300 మంది విద్యార్థులు పాల్గొన్నట్లు తెలిపారు. ఈ దిశగా టచ్ ఏ లైఫ్ ఫౌండేషన్ చేస్తున్న సేవలు ఎంతో ప్రశంసనీయమని ఆమె కొనియాడారు. విద్య అనేది వ్యక్తి జీవితాన్ని మారుస్తుంది, కుటుంబాన్ని అభివృద్ధి పథంలో నడిపిస్తుంది, సమాజాన్ని సుస్థిరంగా నిలబెడుతుంది అని చెప్పారు. కాబట్టి ప్రతిభ గల ప్రతి విద్యార్థి తన లక్ష్యాలను సాధించేందుకు ఆర్థిక పరిమితులు అడ్డంకి కాకూడదని ఆమె స్పష్టం చేశారు. ఈ స్కాలర్షిప్ క్యాంప్ ద్వారా విద్యార్థులకు అవసరమైన ఆర్థిక సహాయం అందించడంతో పాటు, వారిలో ఆత్మవిశ్వాసాన్ని పెంపొందించడం కూడా లక్ష్యంగా పెట్టుకున్నామని తెలిపారు.టచ్ ఏ లైఫ్ ఫౌండేషన్ ప్రతినిధులు మాట్లాడుతూ, భవిష్యత్తులో కూడా మరిన్ని ప్రాంతాల్లో ఇలాంటి స్కాలర్షిప్ క్యాంపులు నిర్వహించి, పేద విద్యార్థులకు అండగా నిలవాలని తమ సంకల్పాన్ని వెల్లడించారు. విద్యార్థులు ఉన్నత చదువులు అభ్యసించి సమాజానికి ఉపయోగపడే వ్యక్తులుగా ఎదగాలని ఆకాంక్షించారు.ఈ కార్యక్రమంలో టచ్ ఏ లైఫ్ ఫౌండేషన్ ఫౌండర్స్ రీనా,విభూతి మరియు టచ్ ఏ లైఫ్ ఫౌండేషన్ ప్రతినిధులు పాల్గొన్నారు